Kyosy: Bernadus Loblobly
Leky neke amosw a i deny ma yala ma myaty mane. Sew desike yabuk anan deruke ma rtaklulu ror i ode syurat a sir, byo, "Ana kala ma kmwaty mane, lemade, ma ksurat e ma kmwaty keskye myety a wasikw a snuratare."
Lemade Leky desike syurat a anan a deruke byo, "Ana kmwaty ti kbwa mane, ode mimorih ti a nus neke kete myobak a tun, kali ana mitot a tun."
Syurat a sir maktei bonyo, Leky desike byohe, "Kmwaty mane de, msyeak ma mkyali yaw ti a ity wait a sekye kseri ne bo." Lemade, myaty. Myaty ode anan deruke ausw amury a ral i ma rkali i ti wait a sekye kserike.
Lenla deruke ramin desike bony ma ausw ma amury a rnoha kotut ma ra bo. Kbya nini a klia seure ma kyait a hulke itw bonyo, leky a amurkye byu ti a auskwe de byohe, "Awa, amakw wasi a snyurat nekre ttomolu ma ktei de. Kesye, ak kbwai a utan ti a ksukar ei utan ti a kobok ohe, tun kabei ne amaku ibuma kete taka tun ne de? Kali ana taka tun desyo tatot tun."
Lemade Leky amury desike mbwa. Leky desike mbwa ti o msukar a alaske krala ne ma mbwa ti mo. Dai a singa nekre raktemtem a rbob a wenatke ti a desy. Ode Leky desike ti a musoblai o ti a singa desikre uno matat neke mo. Heal mahatw lan nekre lema rawawai a Leky desy elik. De Leky desike byu ti a rala de byohe, "Heal mahatw nekre, iry o asw o hahy nekre ramtaut a sir. Ode kmwa ma kusoblai yaw ti a unomatat mo ne lema rkora yaw ta, lema rkuty keyat to lema rhe har a yaw e? A amakw a wasi snyurat nekre anakai lema mlay."
Lemade, Leky desike yolik a i. Yolik i ma mya ma yait a kausuke, ode kausuke byu ti i de byohe, "Moskya?"
Deike bonyo byo, "Kbwa ti a ksukar a alaske krala ne ma kobak a snyurat a amaku a itanuk nekre oh,e mlay ta sal ta lema. Kbwa ti o singa nekre rbob ma rkoal a wenatke ti desy, ode kusoblai yaw ti kusoblai yaw ma ti a unomatat nekre mo, lema rkuty o rhehar a yaw ta nam de. mamwaw sir bo. Lemade kbwohe, 'Ay amaku wasi a snyurat nekre anakai a lema mlai.'"
Msarinke huruk bonyo byu ti a wai auskwe de byo, "Awa, kala ma kbwai a alaske krala ne huruk ma ne."
"Ode mbwa. Mbwa keskye kete mumluak a ity amatke wasi snyuratare."
Bya ti a inait o bya ti mo, harimau o nekre rbob a wenatke a raklelela ti hah desike ode, Leky amury desike yala ti sir kola yala ti a singanare ne huruk. Isoblai i ti isoblai i ma ti a utno matat nekre mo lema rawawai io namit-namit de, mamwaw sir a ror i bo. Byu huruk ti rala de byohe, "Amakw wasi snyurat nekre kikakmet. Lema mlay."
Lemade, yobak kotw ti desy ma ktei bonyo sekwe bya o mya. Sekwe bya o myai hnuke ma mya ma yait kausuke o kausuke yena i de byo, "Moskyabei ne nenmo muma nede?"
"Kbwo de kbwa ti a ksukar ei alaske krala ne ma kuobak tun. Kesye de lema kika tun kutot. Ya de amaku wasi a snyurat nekre anakai lema mlai."
Lemade kausuke byohe, "Ode kete ba ti ba ma o namit-namit. De, tamin a sekye krala ko kika kotw o abw ta nam mo ta o tenw. Dete lema, desyo ma ity tobak ity totut ma tma ma ta o tenw ti ity seitke kralake bo."
Msarinke bonyo bya o lema lyosu ti a kausuke. Bya huruk ba ti a syukar alaske krala ne o. Sew desike iry neke yor wasi asure rba ti a rsor. Iry desike wasi asure radoha hahkye ma ruk a i ti a hah desike. Malmata ruk a i mo Leky desike bya ti isoblai i ti isoblai i ma ti asw desikre uno matat bo. Ode iry desike yal a wasi a huskwe ma yal ma ryama hyunw a hahy desy ma ktei bonyo, asw desikre rulak sir ti radoha Leky desike rba ti a rsok a leti o lwaw o nam nekre ma rkora i ti desike nini lyebur a sir ma syai bai a akwe ktutuke ti a imin ti.
Ti tyaklulw akwe bakbakanke ode yema nua desikre ma iora ikruan i ti desy ode larare knyahnanaha ti hah desike.
Lyaw ma iry desike kyaty a wasi asure ma ramai hnuke ode sekwe bya ti a yala ma ana idi bonyo, Leky desike mor toha akwe ktutu desy ma mmwai hnuke. Mya ma inait kausuke bonyo, kausuke yena i de byo, "Moskya?"
Byo, "Awa, mswak a yaw e. Asure rkuty a yaw ma a, kumnu a kumlarit a yaw ma lar o wahar yaw ma khwait larakure mai hnuke bony de."
"Kali?"
"Kali a malmata, ruka hahy neke ma askwe ebuke ryama hyuny hahkye ma ktei bonyo, asure radoha yaw mo rkora yaw mo rkuty a yaw ma kumnu a kumlarit ma lwaukure mswak e lan a ksyalak i bo."
Lemade kausuke byohe, "Aaa, liahke ity amatke yala ma myaty desikeo syurat a ity ma: kete taobak tun kali ana tatot tun. Keskye amury o ne lema mbwuma mutohak a nam. Lema mtwohak a snyurat a ity amatke itanukke dendye skarang neke mutot ma ne nde! Mutot a tunke ma ne nde. Isimkwe ksunw ma nede ana tala o kolkyabei a?"
Lemade kausuke byu ti i de byohe, "Ana mala huruk e?"
Byo, "Lema kala de."
"Aa, ode kyala kyosy senweke ma kibai lulkwe neke, kete mdwakin ma muobak tun, kali ana mutot tun. Syurat a ity amatke itanukke kimin ity ralatke kralake ma tamorih neke kete taobak tun, kali ana tatot tun."
Ma tkunw neke klalake desdye, ode ktei desdye.
