Kyosy a: Bernardus Loblobly
Sew desike mlinke kele ralik a nulke ti a tasi ne bo, lema kika esw elik-elik. Ode metkye kele rotuk bai tasi so mo nus neke ti bakbak keskes.
Mus neke syai ei akwe ktutuke ti a imin a akwe ktutu ke ode syon bai tasi ne mo byo, “Akwa mety neke lan da?” Lemade ikous, ikous ma ikita de byohe, “Edo, mlin neke eras de ese yal ma kswobal ma o wabal ba?”
Desike bonyo, Tir desike ikita de byu ti de byohe, “Phwekamwe, iry utan maoly neke rsobal ma o wabal ba dakun e?”
Desike bonyo Mus desike itomolu bonyo, ikita de byohe, “Hei! Kete mhwury ma kbwa ti kkwohw matamkwe ti desy ko!”
Desike bonyo Tirke ikita de byohe, “Mmwa nde; de ana kula e? Lema kula de kukita o bo.”
Ti Mus desike mamwaw i, ode yatos bai a tasi ne ma mlin ne eras lanidik, de ikous huruk ma ikita de byohe, “Edo, mlin neke eras lanidik de, ese yal ma kswobal ma o wabal ba?”
Tir desike itomolu huruk bonyo byohe, “Phwe! Iry utan maoly nekre rsobal ma o wabal rhe dakun e?”
Muske byo, “Hei! kete mhury ma ti kkwohw matamkwe ti desy ko!”
Tirke itomolu bonyo byu ti Muske de byohe, “De mmwa bony de. Ana kula, kali a kuka simakw o lwaukkw kola o e? Kubobob ti wenakkwe bo.”
Mus desike mamwaw i huruk, mamwaw i ode dai e ikous huruk, ikous huruk ma ikita de byohe, “Edo, akwa mlin neke eras lanidik de ese yal ma kswobal ma o wabal ba?”
Tir desike itomolu huruk bonyo byohe, “Phwe! Iry atyat a, iry utan a maoly nekre rsobal ma o wabal a rhe dakun e?”
Muske itomolu Tirke ma itanuk koldyesy bonyo, ikita de byohe, “O ode mukita yaw ma kbwa ti kkwohw matamkwe!”
Desike bonyo Tirke byohe, “Mmwa nde. Mmwa bony de. Ana kula e?”
Mus desike bya de. Yorw toha akwe ktutu desy ma bya ti a inait Tirke bonyo, Mus desike yal a lwau a lulure ma yal ma tyabaka i. Itabak a Tirke bonyo, Tirke rakryaktyanare kryakit a Muske lwauke serit de. Lemade Muske byohe, “Mtwunik a yaw dete lemamo ana kkwohw matamkwe ko, de ana kal simakw serida ke ma kkwohw matamkwe o ana mmwaty!”
Ma Tirke ikita de byohe, “Mkwohw bony de; kula e? Kumin wenakkwe ma mamwaw yaw bo.”
Lemade Mus desike yal a lwauke lullkwe seridake huruk ma yal ma itabak a Tirke bonyo, rakryaktyanare kryakit i huruk de. Kryakit i huruk dendye byohe, “Hei, msweak ma mtwunik a yaw mirin ma adoko kbwa de ana mal nini kkwohw matamkwe ti ne ko. Dai kkwohw matamkwe o lema mbwuma mtwunik yaw de mkwumak eta yaw. Ana ktwabak matamkwe!”
“
Mtwabak matakkwe bony de; kula e?”
Lemade Muske yala lwauke serit huruk ma yal ma tyabaka i. Itabak i bonyo ryakit huruk lwauke seridake de. Ryakit lwauke seridake huruk dendye, Mus desike byohe, “Mtwunik yaw mirin, mtwunik a yaw mirin dete lemamo ana ktwabak matamkwe huruk mane ko!”
“
De mtwabak yaw bondye dai muala yaw ne mo kula e? De kala o de lema kula, de mala yaw ode mamwaw yaw bo.”
Lemade yal lwauke seridake ma itabak i bonyo ryakita lwauke ate deny, ma sima o lwauna Tirke rakryaktyanare kryakit mumu, dendye lema iwai yal de. Lema iwai yal bonyo, Tir desike yuka reanke ma kmya de, “Uuuu reanooo mmwaoooo...”
Desike bonyo Mus desike ikita ma byohe, “Hei, de mabuka rean ne ma kmya ma kyala kolkya?”
“
Wa! de metkye nalohdaike mane kuka reanke ma kmya ma kyei kwenake nde.”
Byo, “Lema! de mtwunik yaw ma kbwa.”
Desike bonyo Tir desike yuka reanke huruk de, “Uuuuuuu reanooooo mmwaooooo...”
Reanke kyala ma kmya. Manahmake kmya kmya mane, manahmake kmya kmya huruk ma kinait bonyo, byohe, “Mtwunik yaw ma adoko kbwa de, manahmake kyait ne mane ko.”
Desike bonyo Tirke byohe, “Uuuuuu reanooo mmwaooo...”
Manahma desi kmya ma kyahlun eta dai a Mus desike yor Tir desike ti hah desy, ma Tirke ryakit eta Muske ti desy ma reanke lan ma ti ktyutw teike. Muske mmwaty ti wenamkwe bonyo, Tirke isisi i toha rakryaktyanare. Muske mmwaty ma mumanw mumanw ti desy, ode Tirke imina wenake ma isesenan bo.
Klalake desy de.
